တရားမ၀င်လက်နက်တစ်ခု၏ ပိုင်ရှင်ဟု ပြောခံခဲ့ရသော သတင်းကြောင့် ၀မ်းနည်းမိတယ်ဟု ချင်းတိုင်းရင်းသားရေးရာဝန်ကြီး ဦးနိုထန်ကပ် ဆို

ဇူလိုင်(၂၁)၊ကလေး။

ဒုရဲအုပ်အဆင့်ရှိ ရဲဝန်ထမ်းတစ်ဦးထံမှ ရှာဖွေတွေ့ရှိသော ပစ်စတို အမျိုးအစား လက်နက်ငယ်အား အဆိုပါ ဒုရဲအုပ်မှ ရဲစစ်ချက်တွင် လက်နက်ပိုင်ရှင်မှာ ချင်းတိုင်းရင်းသားရေးရာဝန်ကြီး ဦးနိုထန်ကပ် လက်နက်ဖြစ်ကြောင်း ထွက်ဆိုမှုအား ၀န်ကြီးအနေဖြင့် များစွာ ၀မ်းနည်းခြင်းနှင့် ရင်ဆိုင်နေရကြောင်း သိရသည်။။

အဆိုပါကိစ္စနှင့် ပတ်သက်၍ ချင်းတိုင်းရင်းသားရေးရာဝန်ကြီးက ၄င်းအနေဖြင့် ၀န်ကြီးတာဝန်ထမ်းဆောင်းခြင်းသည် ပြည်သူများ၏ တခဲနက်ထောက်ခံမှုနှင့် ခက်ခက်ခဲခဲ ဒီတာဝန်ကို ထမ်းဆောင်ခဲ့တာဖြစ်ကြောင်း ဘယ်သူ ၀န်ကြီးဖြစ်စေဆိုပြီး ခန့်အပ်ခြင်းခံခဲ့ရတာ မဟုတ်ကြောင်း ယခုကဲ့သို့ ထွက်ဆိုချက်ကြောင့် ပြည်သူတွေအား ဘာဖြစ်တာလဲ ဆိုတာ သို့လောသို့လော့ ဖြစ်အောင်လုပ်တာနဲ့ တူကြောင်း တရားရုံးမှာ ထွက်ဆိုမှုမဟုတ်ပဲ ရဲထွက်ချက်တစ်ခုထဲနှင့် မီဒီယာဆီ ရောက်သွားခြင်းသည် ဘာကြောင့်ဆိုတာကို ၄င်းအနေဖြင့် လုံးဝ နားမလည်ကြောင်း ပေါ်ပြူလာနယူးစ်သို့ ပြောသည်။

ဆက်လက်ပြီး ၀န်ကြီး က “ဒီကိစ္စဟာ ပြည်သူကို စိတ်ဆင်းရဲအောင် ဘာဖြစ်နေလဲဆိုတာ သို့လောသို့လော ဖြစ်အောင် လုပ်တာနဲ့ တူနေပါတယ်။ တရားရုံးမှာ ထွက်ဆိုတဲ့အခါ ဒီကိစ္စကို ပြောင်းလို့တောင် မရဘူးမဟုတ်လား။ ရဲမှာ ထွက်ဆိုတာက တရားရုံးမှာ အမျိုးမျိုးပြောင်းလည်းတာတွေ ရှိတယ်လေ။ ဆိုတော့ ဒီဟာကြီး အတည်မဖြစ်ဖို့လို့ ပြောလို့ရတဲ့အပိုင်းတွေ အများကြီးရှိတယ်လေ။ ဆိုတော့ ဒီဟာကြီးကို ဂျာနယ်တွေမှာ သွားဖော်ပြတာဟာ လူတစ်ဦးတစ်ယောက်ရဲ့ ကျွန်တော့်ကို အထက်လူကြီးတွေကပဲ ဖိအားပေးအောင် တမင်သက်သက် အရေးယူအောင် ဖိအားပေးတယ်လို့လဲ ကျွန်တော် စွဲယူလို့ရတယ်လေ။ကျွန်တော့်အနေနဲ့ ဒီ အဟုတ်မှန်တာကြီးကိုပြောတာ တရားရုံးအထိ တက်ပြီးရင်ဆိုင်မှာပါ။ ဘာဖြစ်လို့လဲဆိုရင်တော့ ကျွန်တော့်ဘက်က သိသိသာသာ မှားနေရင်တော့ ရှင်းရှင်းပြောရရင် ခံမှာပဲ။ ယောကျာင်္းပဲလေ” လို့ ပေါ်ပြူလာနယူးစ်သို့ပြောကြားသည်။

အဆိုပါကိစ္စအား တရားဥပဒေရေးရာ ကျွမ်းကျင်သူ တရားရုံးချုပ် လွှတ်တော်ရှေ့နေ ဦးရောဘတ်စန်းအောင်မှ “လိုင်စင်မရှိရင် ဘယ်သူမှ သေနတ်ကိုင်ခွင့် မရှိပါဘူး။ ချင်းတိုင်းရင်းသားရေးရာဝန်ကြီး က အရင်တုန်းက ဘာလုပ်ခဲ့သလဲ။ အဲဒီ လုပ်စဉ်တုန်းက သေနတ်ကိုင်ခဲ့သလား။ ကိုင်ခဲ့ရင် အဲဒီသေနတ်ကရော လိုင်စင်ရှိလား။ အခုလဲ လိုင်စင်မဲ့ သေနတ် ကိစ္စပေါ်လာတဲ့အခါ ဘယ်လို ဆက်စပ်သလဲ။ အဲဒါတွေကို တွက်ဆပြီးမှ ဒုရဲအုပ်ကလည်း သူ့သေနတ်မဟုတ်ပါဘူးတဲ့။ ဟိုကလည်းပြောတာ သူမသိပါဘူးလို့ ပြောတယ်။ အဲဒီတော့ ဒါတွေက တရားရုံးမှာပဲ စွဲချက်တင်ပြီးမှ အဖြေမှန်ပေါ်အောင် ဖြေရှင်းရမယ့်ကိစ္စ။ အခုတော့ ပေါ်ပေါက်နေတဲ့ ကိစ္စက ဒုရဲအုပ်ရဲ့ ဖြောင့်ချက်အတိုင်းဆိုရင် ဥပဒေအတိုင်းပဲ ဆက်လုပ်ရမှာပဲ။ ဒီလိုဝန်ကြီးတွေက အမှန်တကယ် တရားမ၀င်လက်နက်ကိုင်တာကို ခွင့်ပြုလာမယ်ဆိုရင်တော့ အစိုးရ အဖွဲ့အတွင်းမှာ ဗိုလ်ချုပ်အောင်ဆန်းတို့ခေတ်ကလို ကျော်မကောင်း ကြားမကောင်းတွေ ဖြစ်နိုင်တယ်။ အရင်ကလည်း ရှိခဲ့ဖူးပါတယ်။ ၁၉၇၆ လောက်တုန်းက ကယားပြည်နယ် ပြည်သူ့ကောင်စီဥက္ကဋ္ဌ ဗိုလ်မှူး စ၀်ငွေသောင်း တရားမ၀င်သေနတ် သူ့အိမ်မှာတွေ့လို့ သူ့ကို ထောင် (၁) နှစ် လောက်ချခဲ့ဖူးတယ်လို့ ကြားဖူးပါတယ်။ ဥပဒေအရ ဒီကိစ္စကို တရားဥပဒေပိုင်းအရ တိတိကျကျ မှန်မှန်ကန်ကန် လုပ်စေချင်ပါတယ်။ နို့မိုဆိုရင် သေနတ်ပစ်မှုတွေ ဖြစ်မှာ စိုးရိမ်ရပါတယ်” လို့ ပေါ်ပြူလာနယူးစ်သို့ သုံးသပ်ပြောကြားခဲ့သည်။

ကလေးမြို့ရှိ နိုင်ငံရေးလှုပ်ရှားသူများအဖွဲ့မှ နိုင်ငံရေးလှုပ်ရှားသူတစ်ဦးမှ အဆိုပါကိစ္စနှင့်ပတ်သက်၍ မည်သူက အမှန်ဆိုသည်အား တရားဥပဒေက ဆုံးဖြတ်ချက်ချပြီးမှသာ အတည်ပြုနိုင်မည်ဖြစ်ပြီး ၄င်းအနေဖြင့် အဆိုပါ သေနက်မှာ ချင်းဝန်ကြီးပိုင် သေနတ် မဟုတ်ခဲ့ဘူးဆိုလျှင် အမှားထွက်ဆိုခဲ့သည့် ဒုရဲအုပ်အနေဖြင့် ပုဒ်မ တစ်ခု ထပ်တိုးမည်ဖြစ်ကြောင်း ဒေသခံ ပြည်သူများအနေဖြင့်လည်း အမှုမှန်ဖြစ်ပေါ်လာသည်အထိ စိတ်ဝင်စားစွာ နားစွန့်နေကြမည်ဖြစ်ကြောင်း ပေါ်ပြူလာနယူးစ်သို့ ပြောကြားခဲ့သည်။

ဇူလိုင်လ (၁၇)ရက်နေ့က (၈) နာရီအချိန်ခန့်က ကလေးမြို့ တာဟန်းရဲကင်းရှိ ကျဲအိုဒင်မွိုင်းနေအိမ်တွင်းသို့ ၀င်ရောက်ရှာဖွေရာ တရားမ၀င် ပစ်စတို တစ်လက်နှင့် ကျည်အတောင့် (၃၀) အား ဖမ်းဆီး ရမိခဲ့ပြီး ဒုရဲအုပ် ကျဲအိုဒင်မွိုင်းအား စစ်ဆေးခဲ့ရာ အဆိုပါ လက်နက်မှာ လွန်ခဲ့သော (၇) လခန့်က ချင်းတိုင်းရင်းသားရေးရာဝန်ကြီး ဦးနိုထန်ကပ်မှ အပ်နှံထားခဲ့ကြောင်း ဒုရဲအုပ် ကျဲအိုဒင်မွိုင်းမှ ထွက်ဆိုထားပြီး ဒုရဲအုပ် ကျဲအိုဒင်မွိုင်းအား (ပ)၃၈၄/၂၀၁၄၊လက်နက် ၁၉(စ) ဖြင့် ကလေးမြို့နယ်ရဲတပ်ဖွဲ့မှူးရုံးမှ ဒုရဲအုပ်လှသိန်းမှ တရားလိုအဖြစ် အမှုဖွင့်အရေးယူထားကြောင်း သိရပြီး သိမ်းဆည်းရမိသော ပစ်စတိုသေနတ်မှာ PZ 27251 နံပါတ်ပါ အမေရိကန်နိုင်ငံလုပ်ဖြစ်ပြီး ကျည်တောင့်များတွင် 7.65BR 11SB ဟု စာတန်းများ ပါရှိကြောင်း သိရသည်။

ချစ်သူမောင်

ဓာတ်ပုံအား လှိုင်ထွန်းမှ ကူညီသည်။